1. حدثنا قليلاً عن نفسك .

انا محمد عبد العزيز .. خريج كلية الفنون التطبيقية قسم الاعلان دفعة 2001

اعمل فى مجال تصميم الاعلان والشعارات والخط العربي

2. كيف كانت بدايتك فى هذا المجال ؟

بدايتى فى مجال الخط العربى بدأت وانا فى المرحلة الابتدائية عندما كان احد المدرسين بالمدرسة

من محترفى الخط العربى . فكان بعد الشرح يملأ السبورة بتحفة من تحف الخط الامر الذى لفت انتباهى فكنت ابدأ معه فى الكتابة

فى كراستى وبعد ما ينتهى اكون قد انتهيت معه .. وكان بيفرح جدا لما يشوف خطى وكانت توجيهاته عبارة عن اللوحات اللى بيكتبها

لدرجة انى تسببت مرة فى مشكلة لاحدى المدرسات لما دخل احد الموجهين وطلب يشوف كراسات للطلبة وكنت منهم فسألها ازاى هى تكتبلى فى كراستى .. ولم يقتنع غير لما شافنى بكتب فعلا .. ومن الفترة دى بدأ حبي للحرف العربى .. ولكنى للاسف لم اكمل دراستى الاكاديمية فى مجال الخط واكتفيت فقط بالموهبة اللى طورتها بعد كده قدر الامكان بالمشاهدات والممارسة المستمرة ..

3. ولما اخترت هذا المجال تحديداً ؟

لحبي الشديد للحرف العربى .. واحساسي بانه حالة من الرقى والسمو النفسي مش مجرد كتابة ..

الحرف ( والعربى بالذات ) يمتلك روح خاصة جدا وكأنه كائن حى ممكن يضحك ويبكى ويغضب ويفرح

وحركة الحرف بالاضافة للعلاقات بين الحروف المختلفة وبعضها فيها من التناغم والانسجام اللى بيشعرنى انى فى غاية السعادة

4. ما هى الأدوات التي تستخدمها فى أعمالك ؟

اى أداة ينتج عنها خط ممكن استعملها( بوصة – قلم مشطوف او عادى – فرشة – الوان – كمبيوتر حتى فى بعض الاحيان )

5. ماهى مصادر إلهامك ؟

المصادر كتير جدا .. طبعا اعمال فنانين سابقين ومعاصرين – صور الطبيعة – تحليل حركى للانسان او الحيوان

ممكن حتى شغل ناس مبتدئين فى مجال الخط العربى

6. ماهى الصعوبات التى واجهتك اثناء مشوارك وكيف تغلبت عليها؟

اهم الصعوبات هى عدم الاهتمام اساسا بفن الخط العربى واهماله الا فى اضيق الحدود ونظرة كتير من الناس للخط العربى على انه مجرد اداة اعلانية مش فن قائم بذاته بل يمكن من افضل الفنون البصرية ( ان لم يكن افضلها من وجهة نظرى )

كمان الافراط فى استخدام الحرف اللاتينى وتفضيله على الحرف العربى بالذات فى تصميم الشعارات

وللتغلب على المشاكل دى كلها كان لازم يظهر الحرف العربي بشكل غير المألوف مع الحفاظ على شخصيته وروحه وظهر ذلك بوضوح في اللوجوهات والمخطوطات التي قمت بتنفيذها .

7. أي الأنظمة تفضل ويندوز أم ماك أم لينكس؟

انا بشتغل ويندوز او ماك

8. ما هي المواقع المفضلة لديك والتي تتصفحها باستمرار ؟

Pinterest

Behance

واى موقع خاص باعمال فنية حتى وان كانت لفنانين اجانب

9. هل تفضل العمل بشكل حر؟

اكيد بالنسبة لى العمل الحر افضل كتير لانه بيتيح لى فرصة اكبر فى التفكير بالمنطق الخاص بى بدون فرض اى قيود من شأنها تشويه الصورة اللى بكونها فى خيالى لاى عمل بشتغل عليه

11. من هم المصممين العرب أو الأجانب الذين يجذبون اهتمامك .

هما كتير جدا بصراحة ولكن اخص منهم

• المايسترو حسن مسعودى ( العراق ) 
• نجا المهداوى ( تونس )
• سامح اسماعيل ( مصر )

ومن الاجانب

• John Stevens
• Denis Brown
• Alice Young

12. كيف ترى مستقبل الجرافيك والخط العربي فى الوطن العربي ؟

مستقبل الجرافيك والخط فى الوطن العربى هيبقى باذن الله احسن كتير من الفترة اللى فاتت .. وفيه شباب موجودين دلوقت بالفعل عندهم طاقة كبيرة جدا وعلى قدر عالى من الابداع والتميز حتى المبتدئين منهم بشوف شباب كتير عنده رؤية ورغبة عالية جدا أكيد مع الاهتمام والدراسة هيكون لهم بصمة واضحة جدا إلى جانب تطور النظرة للخط العربي ليكون فن يختلط بالفنون الأخرى عشان يوصل رسالة حقيقية.

14. ماهي نصائحك للراغبين بتعلم الخط العربي .

اى حد يحب يتعلم خط عربى مهم جدا انه يحرك ايده بحرية تامة ويهتم بدراسة شكل وشخصية الحرف كويس مع عدم استعجال النتائج

ومهم جدا كمان تغذية الذاكرة البصرية باعمال فنانين مختلفين و دراسة العلاقات المختلفة بين الحروف وبعضها وقدرة كل فنان على اظهار العلاقة دى بشكل كويس وناجح

بجانب الممارسة المستمرة والتقييم لمتابعة مدى تطور المستوى اللى وصل له ومحاولة تحسينه باستمرار

15. ضع شئ للتواصل معك من خلاله ورابط صفحة اعمالك .

behance

facebook