1-ممكن تعرفنا بنفسك

الحسن حسني الدسوقي ، مواليد 87 فلسطيني محل الإقامة القاهرة ، Senior UX/UI Designer، خريج إدارة مالية ومصرفية 2007.

2-كيف كانت بدايتك فى هذا المجال؟

البداية أذكرها جيداً وأحمد ربي مليون مرة على هذه البداية ، 2002 كنت شفت برنامج Adobe Photoshop بإصدارو الخامس على جهاز واحد صاحبي وكان بستخدمو لطابعة الورق والتعديل على ملفات ، طلبت من صديقي الـ CD وكانت النسخة عربية ودي اصعب حاجة ممكن تواجهك انك تستخدم برنامج زي برنامج Photoshop وبالعربي في اول مرة تشوف فيه البرنامج …. سطبت البرنامج عندي على الكمبيوتر وقعدت ألعب شويا في الأدوات وفرحت جدا من الإمكانيات إلي بقدمها البرنامج ، ودي كانت الإنطلاقة فضلت على الحال ده ، فيديو على الإنترنت من هنا على فيديو هنا بقيت متابع شيق لكل الإصدارات وافهم واعرف كل تحديث إيه الإضافات إلي بتيجي معاه وده بفضل الـ Short courses إلى موجوده على Lynda واهمها Essential Training و باقي الـ Courses إلى كانوا بيطرحوها وده خلاني عندي معرفة لابأس بها في أغلب برامج Adobe إلي بتنزل كحزمة مع بعضها ( adobe photoshop – Adobe Illustrator – Adobe soundbooth – adobe Audition – adobe fireworks – adobe dreamweaver – adobe after effects – adobe premiere – Adobe Flash Pro ) وغيرها من البرامج.

وأقدر اقول على الفترة مابين 2002 – 2007 هي فترة إطلاع على كل الحاجات إلي ذكرتها وممارسة كل حرف موجود وبيتزكر في الـ Courses ودي حاجة مهمة جدا في مجالنا ( الممارسة ) بدونها مش هتفضل في مستوى معين وغيرك هيفوتك بمراحل وانت لسا برضو مكانك .

إنطلقت بعد كدة لقيت نفسي في مجال الويب اكثر من موضوع الجرافيك وده لأني كنت متيقن وعارف انو موضوع الجرافيك حاجة صعبة جدا ومش سهلة زي ما أي حد ممكن يتخيل ( الموضوع محتاج عندك الموهبة – عندك الخيال – عندك الممارسة اليومية من قبل ماتكون عرفت انك عايز تكمل في المجال ده بشكل جدي – درست العلم ده صح بكل أركانو – وتدربت وشفت وتابعت ناس عملاقة في المجال ده عشان تصنع الفضاء الخاص بيك في مرحلة ما . وعليه كان متوفر قدامي الويب بدأت اخد اعمال من ناس واصدقاء واسلم الشغل واتعلم من الاخطاء .

كنت أحب جدا ومازلت مبدأ المشاركة والمتابعة والتعب والبحث والمعرفة في المجال ده وبنام وبحلم ودماغي هتاخدني لأماكن محدش هيتخيلها لأني بكل تواضع متيقن من حاجة إني في يوم من الايام لازم اكون عملت حاجة محترمة أنا اكون راضي عنها واقدمها للناس والمجتمع وكل إلي حواليا يبقوا فخورين بإلي بعملو .

وفي جانب تاني موضوع إني اشاهد واتابع الـ Online Courses خلاني عندي حاجة تانية أمتلكها وهي التدريب ، الأسلوب والعلم إلي استفدتو من الكورسات دي خلاني افكر جديا إننا لازم ادخل المجال ده وادي كورسات للناس تستفيد وتتعلم زي ماانا اتعلمت والحمدلله ربنا وفقني جدا في الموضوع ده أعطيت اكتر من 50 دورة تدريبية في اكتر من 7 شركات تدريب ، وشركات التدريب دي في بلدنا ( فلسطين – غزة ) ال 7 دي تقريبا هي كل الشركات المتخصصة في مجال التدريب ، مع إنو البداية كانت متواضعة جدا وكلها اخطاء وبحمد ربنا على سرعة التعلم وحبب خلقه في الطريقة إلي كنت بقدم فيها الدورات ، وإختتمت موضوع الدورات التدريبية دي بـ العمل مع مؤسسات أجنبية بقدم دورات بمنهاج بيتم دراستو ووضعو بعناية للمتدربين الملتحقين بالبرنامج التدريبية و تم إختياري لأقدم البرامج الخاصة بالفوتوجرافي و الويب والموبايل أبلكيشن وختام الكورسات دي كان أكتر من رائع ومخرجات مبهجة جدا بشهادة المشرفين و المتدربين نفسهم ببساطة كانت رحلة قدمت فيها كل ما أملك للمتدربين وربنا شاهد قد إيه بحب أقدم إلي عندي وأفيد الناس إلي حواليا .

3-ولما اخترت هذا المجال تحديدا؟

بالنسبة لإختياري للمجال ده من وانا صغير كان أكتر حاجة بتلفت إنتباهي الألوان والفواصل الإعلانية إلي بتيجي بين الأفلام و المسلسلات وكنت بركز جدا مع اصوات المذيعين في التلفزيون والراديو وده برضو ضافلي ميزة الصوت الإذاعي وعشان أتأكد من الموضوع ده رحت لإذاعة ما وحكيتلهم عايز اجرب صوتي هل ينفع إنو يستجل وكدة ، فجربت وفعلا كان الرد ( صوتك مش محتاج لا تعديل ولا تنقية ولا اي حاجة ) .

عشان ماأبعدش السبب الرئيسي إلي خلاني اختار المجال ده ( المعرفة متوفرة – إطلاع مستمر – شايف نفسي في المجال ده – عايز اعتمد على نفسي وأصرف على نفسي من جيبي – دراستي للإدارة المالية دي اكبر حاجة غلط عملتها في حياتي وطبعا مش هشتغل بحاجة بكرهها بس الواحد ماكانش عارف هو عايز ايه وقتها – محبتي للألوان – للحركة – للصوت – التكنولوجيا بشكل رهيب )

4-ماهى الادوات التى تستخدمها فى اعمالك؟

الادوات إلي بستخدمها ده بيرجع لطبيعة المشروع نفسو ، لكن بشكل عام بستخدم :
1. Adobe Photoshop
2. Adobe Illustrator
3. Adobe Dreamweaver
4. Adobe SoundBooth
5. Adobe Flash Pro
6. Adobe After Effects
7. Sony Vegas

5-ماهى مصادر إلهامك؟

مصادر الإلهام دي فنجان القهوة بتاع كل صباح ومساء مااقدرش مااشربش الفنجان ده كل يوم وفي اليوم مليون مرة :
1. بحب أتفرج ( مش بقرأ ) على الكتب والمجلات المطبوعة وده بفضله عن إني اتفرج واتابع مواقع تصميم الويب لأن طريقة إظهار المحتوى في المطبوعات بتختلف شويا عن طريقة إظهارها في الويب او الموبايل وده حاجة من الحاجات إلي ممكن ألعب بيها بحيث أظهر محتوى الـ project إلي شغال عليه بطريقة مختلفة شويا ده ان شاءالله هتشوفوه في المشاريع إلي لسا مانزلتش على الـ Behance ( قريب ان شاءالله ) .

2. نيجي للمواقع الإلكترونية :
هذكر هنا كذا موقع بتابعم يوميا ومش بمل ولا همل من متابعتهم :
أ . Behance
ب. Pinterest
ج .Awwwards
د. Flatinspire
ه. Css Auther
و. Issuu
ر. themeforest
ز. Dribbble
إلخ …… أنا ذكرت أهمها ( وده بيتطلب مني ساعتين أو اكثر كل يوم صباح تصفح فقط )

3. المجتمع المحيط بيك من اصدقاء وخاصة من نفس المجال سواء في شغلك او برى شغلك ودي حاجة في منتهى الاهمية : في شغلي موجود جمبي صديقي إبراهيم حمدي وصديقي أحمد صلاح ،، مش هقولك ولا هوصفلك المتعة والجو الجميل إلي بنكون موجودين داخله ( تعاون بلا حدود – آراء – مقترحات – نصائح ) ودي حاجة ممكن ترفعك في فوق فوق ولو كانت العكس هتنزلك الأرض في الاسفل .. وعليه كن حريص جدا في اختيار الصديق 🙂 لأنو الموضوع ده هينعكس عليك 🙂

4. نيجي الجانب الأخير : بحب اتابع الأفلام و الفقرات الإعلانية المصورة و الـ Promos إلي بتنزلها شركات التكنولوجيا
هتقولي هتعمل بيها ايه دي في الويب ،، هقولك ليها تخيلها في دماغي بتترجم بطريقة ما وهستفيد.

6-ماهى الصعوبات التى واجهتك اثناء مشوارك وكيف تغلبت عليها؟

الصعوبات دي كل ماحد يفكرني بيها بحس بحرقة في سدري قد ايه انا تعبت عشان اكمل في المشوار ده ، تخيل نفسك الناس ماشية في مشوار طويل وعملت حاجة وانت اصلا لسا مش عارف اللون ده معناه ايه في مجالك دي اول مشكلة ومشكلة كل الجيل اول ماتدخل في مجال معين هتكون عينك على رأس الهرم في ناس بتفهم رأس الهرم ده بطريقة صحيحة في ناس بتفهموا غلط بحيث لو سمحت حضرتك ممكن تديني الباسوورد بتاع راس الهرم في Click وحدة أوصل هناك ،، ودي الحاجة إلي ممكن تخليك ( خليني اكتبها كدة ، قيمتك السوقية = 0 ) ، شغلنا ده ( يارب انت عارف قد ايه انا مؤمن بإلي انا بعملو وأحمدك مليون مرة على النعمة دي ) في ناس هتقول مالو ده اتجنن لا بس في ناس فاهمة انا بكتب ايه ، شغلنا ده محتاج صبر وصبر وصبر وطولة بال بلا حدود عشان لو ماكانش عندك الإمكانية دي سامحني على قولي مش هتقدر تكمل ياصديقي .
تأكد تماما لو دخلت المجال ده وانت مؤمن بيه والله العظيم هتوصل بس حبة حبة .

انا زرت مصر قبل كدة في 2011 وكنت = 0 ،، وأديني جيت مصر وهعيش في مصر وانا قيمتي في مصر ماعادتش 0 مش هكتب ارقام من تواضع لله رفعه .

من الصعوبات التانية إلي واجهتني : اهلي والناس من حولي
السؤال إلي بيتسئلو كل يوم الشاب مننا شغلك ده بيجيب فلوس ،، جوابك في بداية طريقة ( بيجيب فكة يدوبك تقعد فيها على القهوة ) ولما شغلك ده مش بيجيب فلوس بتشتغلو ليه ،، امتى هتكون نفسك ، امتى وامتى وامتى .. لكن ربنا أحياني وأعطاني نفس عشان اقول ( الحمدلله ) لو كنت تركت وسمعت الكلام انا دالوقت فين ؟؟؟؟

صعوبات من نوع آخر ومااقعتدش حد من الاصدقاء إلي في مصر الحبيبة والأصدقاء العرب هتواجهو مشكلة زي المشكلة دي وهي : محدودية الموارد والإمكانيات في بلدي وصعوبة وقسوة الحياة ودي حاجة علمتني الصبر في الشغل واستحمل .. استحمل واستحمل ..

7- أي الأنظمة تفضل ويندوز أم ماك أم لينكس ؟

طبعا بفضل نظام الـ OSX ( ماك ) لكن محتاج يكون عندك مواصفات عالية غير كدة هيكون ضرة ليك مش عون
حاليا بشتغل على الـ 2

8-ماهى المواقع المفضله لديك والتى تتصفحها باستمرار؟

هذكر هنا كذا موقع بتابعم يوميا ومش بمل ولا همل من متابعتهم :
أ . Behance
ب. Dribbble
ت. Pinterest
ج .Awwwards
ح. Flatinspire
خ. Css Auther
د. Issuu
ذ. themeforest

9-هل تفضل العمل بشكل حر ام لا ولماذا؟

العمل الحر ده حبيبي ،، وأكيد أفضلو وبحبو ،، وده سؤال المفروض الإجابة عليه إفتراضية هههه ،،، والسبب حضرتك مصمم إذا أنت حر نفسك هو في حد ممكن يبدع وهو محبوس في قفص الوظيفة ؟ وده إلي خلى المشاريع إلي بنجزها داخل وظيفتي ماتكونش أفضل من اعمالي وانا حر طليق سارح في إبداع الرحمن ،،

10- اعطنا نبذه عن اسلوبك فى التصميم

الأسلوب ده حكاية وعندي ملهاش مفهوم ثابت كل حكاية ليها مداخلها وليه طريقة سرد بحسب المشكلة والعقدة إلي مطروحة قدامك وأكيد كل حكاية وليها مخرج .

انا من الناس إلي مابتحبش ترسم أضلاع .. بس بحب ارسم لوحة ( نصية ) للحكاية او المشروع زي ماتحبوا تسموه بالنسبالي الموضوع عبارة عن حكاية او رواية بحسب طولها وقصرها ، اكيد شفتوا ألف ليلة وليلة إلي كانت بتيجي في رمضان زمان ده بالزبط حالتي إلي بعيشها كل يوم مع شغلي .

بعد ما استكمل كل متطلبات اللوحة :
احب ارسم لوحة نصية على ورقة – ارتب الفكرة في دماغي – أختار لوني – ارسم فكرتي في Adobe Photoshop وأرتبها اكتر واكتر لحد مااوصل للصيغة النهائية …. في حالات بتتطلب مني ( Wireframe ) لكن مش بفضلوا لأنو بحصرك في إطار بعيدا عن الجنون .

11 -من هم المصممين العرب أو الأجانب الذين يحذبون اهتمامك؟

هذكر اسماء واكيد مش كل الاسماء والأسماء إلي هذكرها هيكون في منها اسلوبها في التعامل مع الموقف عاجبني وفي منها طريقة شغلها وفي منها مخرجات الشغل .

بفرح جدا لما يحوذ على إهتمامي مصمم عربي ، وفي الفترة الأخيرة الموضوع ده إبتدى يكبر ويكبر والمصممين العرب عاجبيني
في شغلهم لكن مش عاجبيني في حاجة تانية : ليه مابتحبوش تشتغلوا كفريق ؟؟؟

نيجي للأسماء : صديقي تعرفت عليه في بيهانس اول مرة ( مصطفى وهبة ) شاب مجتهد جدا وأمين ومتقن لعمله وهو نفسو عارف بيعمل ايه بالزبط ، صديقي إبراهيم حمدي ( فريد من نوعه كشغل و طيبة قلب ) ، صديقي أحمد صلاح شخصية قيادية في العمل بشكلها الإيجابي ، صديقي محمد صلاح أسلوب مختلف ! ، صديقي أيمن الشلتوني ( فلسطيني ) متعاون جدا ، صديقي محمد الأغا ( فلسطيني ) شخصية قيادية وريادي وصديقي عامر عناية ( فلسطيني ) شخصية قيادية و مطلع على علم UX/UI ….

انا عارف اني نسيت اسماء كتيرة جدا جدا لكن أكن كل الإحترام لك الأصدقاء وغير الأصدقاء في المجال .

12- كيف ترى مستقبل تصميم تجربة المستخدم فى الوطن العربى ؟

سؤال كبير عايز اجابة اكبر منو من ناس درست ومارست المصطلح ده في دول ماوراء المحيط مش عندنا ، هجاوبك عنو من تجربتي لأني استعنت بالممارسة والفطرة و قراءة بعض المقالات عن الموضوع ده وسمعت من هنا وهناك في حدث و مؤتمر وغيرها …
الجيل ( إلي هو جيلنا ) لسا مشوارو قدامو طويل وانا بقول لحضراتكم ياكرام الجيل ده هجيب العلم الصحيح ان شاءالله لحد عندك ياصديقي العزيز إلي لسا في بداية مشوارك ، أنا عارف اصدقائي إلي حواليا قد إيه متحمسين وبيحبوا شغلهم وقد ايه بيتعبوا كل يوم عشان يطلعوا احسن ماعندهم للناس تستخدموا وتمارسوا في حياتهم اليومية بكل سهولة وسلاسة.

– وبناءً عليه أقدر اقولك بإذن الله إلي جاي حاجة ترفع الراس 🙂

13-ماهى نصائحك للمصمم المبتدئ؟

سؤال جاوبت عليه اكتر من 100 مرة للناس وللأصدقاء ولكل حد قابلتو مهتم بالمجال ده ومش هكل ولا همل من إجابة السؤال ده وربنا يوفق الجميع : كتبت من كم يوم على جروب خاص بمتدربين في مجال Communication Design النصيحة دي :

– هدفك قصاد عينيك ،،، زي اي حاجة حلوة بتشوفها في السوق وبتكون عايزها بحرقة .
– نية خالصة لوجه الله ( توصل للهدف ده بحلوو ومرو ) .
– ( علم ومعرفة ) .. .العلم والمعرفة بتيجي من الجامعات الدورات التدريبية إلى بناخدها وقراءة المقالات و الكتب و اي مكان ممكن تكتسب منو حاجة جديدة …
– أدواتك ( كمعرفة و كإتقان ) المعرفة دي في الدورات التدريبية كلكوا شفتوها ومارستوها ،،، هيفضل عليك جانب كبير ومتعب وشيق وجميل إلي هو الإتقان وده هياخد وقت بس اما توصلو هتفرح جدا وهتعرفوا معنا الفرحة دي أما توصلوا للمرحلة دي ان شاءالله …
– واخيرا من تواضع لله رفعه وعلم الناس علشان ربنا يفتح عليك بعلمه ويرزقك من حيث لا تعلم .

14-ماهي أكثر اعمالك حبا الى قلبك والتي تفتخر بها؟

أتمنى اوصل للمرحلة إلي هكون فيها راضي عن كل الاعمال إلي بقدمها للعملاء على إعتبار إني بقدمها لنفسي اولا قدم ماأقدمها ليهم . لكن هيهات وأعتقد السبب معروف الوقت إلي بمر عليك بيكسبك معرفة وإتقان كل مرة اكتر من سابقها وده شيء مش هيخليك راضي عن أعمالك !!

لكن هتكلم عن آخر مشروع انجزتو وده تقريبا من أكتر الأعمال إلي حبيتها ومفتخر بيها لسا المشروع مانزلش على Behance لكن قريب ان شاءالله هنزلوا بعد مانخلصوا انا والأصدقاء إلي شغالين معايا في المشروع ده
المشروع ببساطة : منصة للعمل الحر للعرب وهيكون في الوقت الحالي إنطلاقته من مصر اسم المشروع superneur
ودي Screenshoot من المشروع:

15-ضع شئ للتواصل معك من خلاله ورابط صفحة اعمالك

facebook
Twitter
Email : [email protected]

My online Portfolio
Dribbble
Behance

واخيرا …. شكرا شكرا شكرا جزيلا ،،، فواصل والقائمين عليها و أيضا معمل ألوان لما تقدمه من معرفة وعلم لإثراء المحتوى العربي بالمجال الرائع ،، شكرا على تعبكم وشكرا على جودة اعمالكم وشكرا على إخلاصكم في العمل 🙂
ربنا يوفقنا جميعاً