1 – حدثنا قليلاً عن نفسك.

أحمد يوسف الخواجة .. مصمم جرافيك وخطاط ومصور… 16 سنه مصرى,, تحديدا محافظه البحيره – دمنهور

2 – كيف كانت بدايتك فى هذا المجال ؟

بدأت فعليا ادخل فى المجال واتعمق فيه من حوالى 3 سنين ,, بدأت انزل اشوف ايه نظام الشغل فى المطابع ومكاتب الدعايه والاعلان ونظام الشغل كان ماشى ازاى ,, ساعتها مكنتش شغال غير مصمم جرافيك فى مطبعه حقيره زى اى مصمم ما بيبدأ فى مصر ,, بعدها بفتره سيبت شغل الدعايه والاعلان نهائى واتجهت للخط والى كان ليه الفضل فى الموضوع دا هو صديقى عبدالله حسن – الله يرحمه ويغفرله – بعدها اخدت كورس فى الخط العربى وبدأت اشتغل فيه ,, ومن ثم بدأت مرحله انى اتطور من نفسى فى الخط بشكل عام واشتغلت فيه .. بس كدا : )

3- ولما اخترت هذا المجال تحديداً ؟

أنا بدأت عموما زى اى مصمم .. مكنتش بشتغل خط ,, وجربت مجالات كتير غير الخط .. اتجهت للخط ليه ؟ عشان لقيت نفسى غير انى بحب الخط العربى و شغل التايبوجرافى عموما ومن صغرى كان حلم من احلامى انى اكتب ” خط عربى ” .

5 – ماهى مصادر إلهامك ؟

مصادر الالهام متعدده .. ممكن تكون لوحة لأحد الخطاطين او شكل الحروف عموما بيدى الهام لأى خطاط
أما الى ممكن اركز عليه جدا facebook ،   behance

4 – ما هى الأدوات التي تستخدمها فى أعمالك ؟

قلم رصاص – مسطره – قلم خط عربى – بوص – حبر – دا عشان شغل الاسكتشات الى بتبقى على الورق –

و برامج التصميم العاديه Photoshop – Illustrator

6 – ماهى الصعوبات التى واجهتك اثناء مشوارك وكيف تغلبت عليها؟

الصعوبات المعتداده الى أى شخص ممكن يواجهها فى بداية تعلم الخط  .. زى ان نادرا انك تلاقى مدرس خط عربى فى مصر .. بصرف النظر عن مدراس الخط بس واحد زيى مكنش هيتقبل فى المدراس دى بسبب سنى .. غير بقا الزهق والملل لما تفشل فى البدايه ودا الى ممكن يكون خط بين الى عاوز يتعلم والى عاوز يلعب .. الزهق والملل مع الاستمرار فى التعلم هيجيب نتيجه كويسه جدا ممكن متحسش بيها غير لما تقارن الشغل القديم بالجديد .. ودا من ضمن الاسباب الى خلتنى احتفظ بإسكتشاتى من ساعه ما بدأت لحد دلوقت ..

7-أي الأنظمة تفضل ويندوز أم ماك أم لينكس؟

بصرف النظر انى مجربتش اللينكس 😀 .. بفضل الماك .. شايفه مريح اكتر عن الويندوز .. غير انى من عشاق Apple 😀

8 – ما هي المواقع المفضلة لديك والتي تتصفحها باستمرار ؟

Behance – facebook – Devintart

9 – اعطنا نبذة عن أسلوبك فى التصميم عموما والخط بصفة خاصة ؟

بحب دايما فى اى تصميم ليا اشتغل على الطابع العربى بالزخارف الاسلاميه والالوان الاسلاميه والحضاره العربيه بشكل عام .. بالنسبه للخط بحب اشتغل بمرونه وحريه من غير ما اتقيض بقاعده معينه إلا فى حالات معينه .

10-هل تري أن بدايتك وأنت صغيرا في السن ستساعدك في المستقبل ؟

دا بيعتمد على حسب شغلى وعلى حسب مراحل تطويرى لنفسى .. ودا اللى بتمناه من ربنا .

11 – من هم المصممين العرب أو الأجانب الذين يجذبون اهتمامك ؟

فنانين كتير جدا منهم – مع حفظ الالقاب – ” محمد رجب – عبدالله حسن – لينجو استوديو – لبنى عبدالعزيز – محمد عطيه – محمد عبدالعزيز – عابد مرزوق ” وبعتذر لو كنت نسيت حد  وبقدم لهم العمل ده من باب الشكر والامتنان  ممكن تشفوه من هنا galleryTypography

12 – كيف ترى مستقبل الجرافيك والخط فى الوطن العربي ؟

بدأت حالة من التطور تحصل فى المجال وبدأ يتوسع بشكل رهيب .. وبالنسبه للخط فى الفتره الاخيره ملاحظ ان فى اهتمام من بعض المصممين انهم يتشغلوا بالخط فى البراند او التصميم بشكل عام و دى حاجه كويسه جدا من وجهة نظرى .

14 – ماهي نصائحك للراغبين بتعلم الخط العربي؟

فى البدايه انه يبدأ يقلد على اسكتشات بالقلم الرصاص ,, بعد ما يقدر يشوف شكل الحروف عامله ازاى ويحفظ تكوينها ونسبتها يبدا يشتغل بقلم الخط العربى .. فى بدايه موضوع القلم دا هيبقى صعب شويه لان سن قلم الخط بيبقى مختلف عن السن العادى للقلم بس كتر المحاوله والاستمرار هيجيب نتيجه ومن نحيه تانيه ممكن ياخد كورس خط عربى او يقدم فى مدرسه الخط اللى موجوده فى بلده .. بس كدا :))

15-هل تريد أن توجة كلمة أخيرة؟

بالتأكيد 🙂 .. أحب اشكر كل الناس الى ساعدتنى انى اوصل للى انا فيه .. واحب اشكر موقع فواصل و خصوصا صديقى واخويا  أ.احمد رجب على المجهود الرائع دا 🙂 ..

16 – ضع شئ للتواصل معك من خلاله ورابط صفحة اعمالك ؟

Behance

Facebook page

Facebook